IV ӘР ҒАМАЛДЫҢ БІР РУХЫ, СЫРЫ БАР

Әзелден әбдегеше, барша ғамалды, өз ретімен жаратқан, әм тәртіпке салған қожамыз тәңірі тағала, пенделеріне ешбір ғибадат уа  ғамалдарды бір-бір сыр, уа мақсұтсыз бұйырмаған. Мәгер адамдар бұ ғамалдардың әр қайсысында да жеңілдік һәм үстемдік етіп сыртқы суретін ғана жеріне келтірген болады әмме мақсұтынан мыстай ғапыл¹. Халбүки, мұның кемшілігі, зарары бек көп – ең бас зарары сол: бұлайшы етілген ғибадаттардың адамға еш жақсы әсері болмайды: көңіл сынбайды, менмендік басылмайды. Сол себепті мұндай әсерсіз  ғамалдар заһирде² суреті ғибадат болып көрінсе де, шын түбінде (алла хұзырында) ғамал болып табылмайды, ғибадат жүмлесінен есептелмейді.

Және соны түсініп кету тиіс: тек жалғыз намаз оқып, ораза тұту ғана аллаға ғибадат ету, бұйырығына бойұсыну болып бітпейді. Бәлки бұ дүние жұртында адамдарға тағаллықты³ нәрселердің әрбірінде алланың өзі көрсетіп қойған жолымен жүру керек болады, бұл алланың көрсеткен жолымен жүру ғибадаттың бек зоры. Алланың жолы деген не?

____________

¹ Мыстай» ғапыл – мүлде өкініп қапы қалу.

² Заһир – көрінісі.

³ Тағаллықты – қатысты, адамдарға тән.