ТОМАН БАЙДЫҢ БАЛАСЫ ӘДІЛ МЫРЗА Я БОЛМАСА, БАЙҒАЗЫ БАЙДЫҢ ҚЫЗЫ АРУ ШАНДОЗ

Күн ілгері жар салып қойғандай–ақ жігіт, қыз көп жиналды. Әр қайсысы да қонақтармен көрісіп танысқанның соңында орынды орындарына отырысты. Іштерінен бір жігітке қарап:

–       Тым-тырыс отырғанша сөз бастасайшы – десті.

Сонда жігіт былайша сөзге кірісті:

 –Естіп келгендерің біліп келдік,

Қуанып жақсылыққа күліп келдік.

Көңілді бір көтеріп қалалық деп,

Асығып іштеріңе кіріп келдік.

Жақсылар сөз баста деп бұйырған соң,

Көңілге келген сөзді ірікпелік.

Тең құрбы кызметіне жұмсағанда

Жал біткен жаман аттай үрікпелік.