ЖОМАРТТЫҚ
«Жомарттық» ашық жүзді шытпағаның,
Мұқтаждан қол қайырың қытпағаның.
«Адаммен адам күні» деген сөздің,
Мәнісін есте тұтып, мұтпағаның.
Көз салып, тұтып шафғат* еске алғаның,
Жетімдер жылап, жесір сықтағанын.
Кәріпке беріп киім жылытқаның,
Көрген күн суықтағы ықтағанын.
Айтыңдар, көрдіңіз бе жомарттардың
Дәулеті етіп қайыр тоқтағанын?
Қайырдың ең үлкені халық пайдасын
Ізденіп, кем-кетігін жоқтағаның.
Сарп етсең дәулетінді ойын-сауыққа
Халалға**, харам қосып боқтағаның.
Қысылып келгендерге қарыз бермей,
Қайтарсаң жомарттықты тұтпағаның.
Аз күнге бар нәрсені бере алмасаң,
Езгілер жүмлесінен*** шықпағаның.
Бұл етіп аз нәрсені алдағандай,
Осы ма адам болып мықтағаның?
__________
* Шафғат – шапағат, рахым, қайырым.
** Халал – адал деген сөз.
*** Жүмле – бұл жерде тобынан деген мағынада.