ЖИҺАНГЕР ХАННЫҢ НЕМЕРЕСІ СҰЛТАН ШАҺИНГЕРЕЙ СЕЙДГЕРЕЙ ҰҒЛЫНА

Қанша айтсақ та хан соңы

Болмаса жалғыз Жәңгірхан

Басқа хандар дүниені

Ғафилдікпен ескермей

Өткізгенге ұсайды.

Өткізгеннің белгісі:

Жоқ бинасы* салдырған.

Мәңгілік аты қалғандай,

Әр уақыт еске алғандай,

Көңілге мұңдар салғандай

Істері жоқ қалдырған.

Ойлай да ойлай қарасам,

Болжай алмай заманды

Бұрынғылар шалдырған.

Шалдырғаны емес пе?

Ұсынса жеткен со күнде

Ғылым үшін кен ашып,

Келер жерін кең ашып

Шамдары жоқ артында

Сөнбестей етіп жандырған,

Ұқып** үшін қалдырған.

______________

*Бина – ғимарат.

**Ұқып – ескерткіш мұра.