ТУМЫШ

                                               XIX 

Тиюге кеп келмейді со себептен,

Ұрынар жазықсызға тентек неткен?

Өзіміз оқытпадық, үйретпедік,

Бұл жерде кім айыпты жөнсіз кеткен?

Әлбетте, біз айыпты, біз айыпты,

Оқытпай балаларға жәбір еткен.

Оқытсақ, біздің дағы ұл, қызымыз

Мақсатқа болар еді барып жеткен.

Алданып жоқ нәрсеге бос қалыппыз,

Біздерге керек еді бұл іс көптен.

Ел өсер, халық құралар ұл мен қыздан,

Оқытсаң үлес алар ғылымдықтан.

Оқытпай ұлың, қызың бос қалдырсаң,

Болуы халықтың надан сол себептен.

«Халық надан, халық надан» деп қайғырамыз

Оқытпай балаларды өтіріктен.

Бар ма екен көргендерің, қайсы халық

Оқусыз мақсаттарын хасыл* еткен.

Оқымай басқа халық табаласа,

Оқусыз біз табамыз қайсы ретпен?

_____________

* Хасыл ету – орындау, мақсатына жету.