ТӘКАББАРЛЫҚ

 Тап болып ғаділ хакім оқымысты

 Жарық күн туар ма екен бізге дағы?

 Жарық күн бізге дағы болар ма екен?

 Ішінен өнер білген жандар шығып,

 Басылған халықтың көңілі толар ма екен?

 Оқытып жас баланы тегісінен,

 Жемісін еткен азап орар ма екен?

 Жетісіп, оқып шығып жас балалар

 Қазақтың көзі ашылып оңар ма екен?

 Болмаса, қайтар баққа тура келіп,

 Олар да құлықсыз, жаман болар ма екен?

 Ер қазақ өнер біліп көзі ашылса,

 Ит дұшпан маңайына жолар ма екен?

 Теңдікті қазағым да бір ел болып,

 Қатарлас басқа жұртпен тұрар ма екен?

 Хал бітіп тегісінен адам болып,

 Жиналып бақ пен дәулет құрар ма екен?

 «Ұл, қызың,– бірдей оқыт»  деген сөзім,

 Тындалып қазағыма ұнар ма екен?

 Тыңдалып қазақ тегіс өнер біліп,

 Зарыққан ерлер көңілі тынар ма екен?