АЛҒЫ СӨЗ

Болмашы бір себептермен басталып, елдің надандығы арқасында өршіп, күшейіп кеткен нәрселер бізде көп. Олар өзі әуелі басталуында мүбақ¹ бір ғамал²  болса да, бара-бара парыз³ ия уәжіптерден⁴ де озып кетісіпті. Соған байланысты заманымыздағы мағруф⁵ жәйлардың бірі – бәдел-хажы. Ғылым, ағарту сияқты еліміздің көзін ашып алға жіберетін орындарға жұмсалуы тиіс болған қаржы-қорлардың құран шариф⁶ бұйырмаған шариғат негізі ыспат⁷  жерлерге шашылуы бұ шығарманы жазуға мені күштеді.

Бәдел-хажы хақында шариғат халимасы⁸ арасында болған түрлі сөздерді «Пидая шарқи», «Фатих әл-қадир» кітабынан алдым. Өз көзіменен көргісі келген со кітаптың «хаж ғаніл ғайр» деген бабына барып қарай қойсын. Хажылықты өтеу қағидаларын мәшhүр «Таузих» кітабынан көшірдім. Әлсіз, шашыранды аңыз-әңгімелерді алудан сақтануға тырыстым. Оқып, қатесін тапқан кісілердің шағыс-арыздарын, саф сөздерін қабыл етуді көппен бірге мен де бірінші міндетім деп санаймын.

___________

¹ Мүбақ – намаз шарттарының бірі, істесе сауап болады, істемесе күнәлігі жоқ.

² Ғамал – әрекет, қағида, ереже мағынасында.

³ Парыз – міндет.

⁴ Уәжіп – бұ да міндеттің бір түрі.

⁵ Мағруф – белгілі.

⁶ Шариф – қасиетті.

⁷ Ыспат – дәлел.

⁸ Халимасы – бұ жерде заң, қағидасы мағынасында.