ШӘКІРТ

Ата-анадан айрылып,

Туған елден бір шетке,

Аттанып тұр жас бала,

Ғылым хасіл* етпекке.

Адамдықтың шегіне,

Жігер етіп жасынан

Бірте-бірте баспалап,

Өрмелеп барып жетпекке.

Ойындағы мүддесі,

Асық ойнап, доп соққан,

Құрбы менен құрдастан,

Озат шығып кетпекке.

Осы жолда ол разы,

Шет жерлерде сарғайып,

Құдық қазып инемен,

Еңбек азап шекпекке.

____________

*Хасіл ету – орындау, бітіру, игеру.